بس ضحكه

كنت اعده فى اوضتى على سريرى زهقت اوى
وفجأه كشرت وامتلكتنى حاله مرعبه من اليأس
كل الابواب اتقفلت فى وشى اختفى الاوكسجين من الاوضه
نمت على ضهرى وحطيت رجل على رجل وبصيت فى السقف
وفجأه لاتنى بقول اضحكى قولت مالها دى مش كانت لسه حالا طالع عينها
ومش عارفه تودى المشاكل فين طنشت بس لائتنى تانى بقول اضحكى
لاحول ولا قوة الا بالله ربنا يشفى بس اضحكى بس وضحكت
اكتشفت ان سقف الاوضه فيه شكل اول مره اشوفه زى مايكون عفريت
بس بيضحك وبعدين فجأه لائتنى بهز رجلى اللى متشعلقه دى وبدندن
على ايقاع اعصابعها بدت سمفونيه الاهات ونبض قلبى بدا يعزف
على كل المقامات روحت بسرعه على درج الشرايط وجبت اخر شريط
لكاظم وشغلته وانطلقت وانطلق بيه السرير حسيت زى مايكون السقف اتفتح بامر من العفريت الطيب
وطار سريرى فى السما وسط النجوم كانو كلهم واقفين صفين على الشمال واليمين
والهوا او ل ماشافنى جرى عليه بسرعه عمل فووووووووووووو لائيت شعرى طاير فوووق غمضت عينى واعدت اضحك
فتحت لما حسيت ان الهوا وقف فجأه السرير وقف وسط السحاب بصتلى سحابه منهم شكلها كده بنت ناس اوى
وقالتلى بشئ من الالاطه ايه مشكلتك فكرت شويه وقولتلها مش عارفه او....نسيت
سمعت صوت ضحك عالى فكرنى بجدو الله يرحمه وهو بيضحك ببص على مصدر الصوت لائيتها سحابه
تانيه بس شكله المره دى راجل كبير كده وطيب قاللى خلاص يبئى مشكلتك اتحلت بس خليكى فاكره
لما تضايقى تانى ابئى اضحكى وفجأه لائيت اختى بتفتح باب الاوضه وبتقولى انتى نمتى ؟وسمعت صوت ضحك عالى
قولتلها فى ايه قالتلى ده الدنيا مقلوبه مش عارفه اشمعنى النهارده الناس كلهم جم قرايبنا وجيراننا يلا قومى وخرجت اختى
قومت وابتسمت وقولت يااااااا ده الموضوع طلع بسيط اوى هى ضحكه وكل المشاكل مش بتتحل بس دى بتتنسى